هاقولك حاجة على الماشى....

هاقولك حاجه ع الماشى

انا شايف ف عينك ضي
وشايف فيكى عمرى الجاي
وقلبى الحي
بحبك
حبتين احساس
وحته ماس
وقمرايه
بتنور ف الضلام ليلى
وقنديلى
وصوت صمتى
وانتى هوايا
وانتى الميل
عيونك جوا قلبى دليل
وشوفك يحيي قلب عليل
وبسمه سنك الطاهر
بتحيينى
وتأويينى
هاقولك حاجه ع الماشى
وانا ماشى وانا نايم
وانا واقف وبتكلم
على عيون القمر
صورتك
بتتكلم
وهامسالى
وسامعها قلبى ويايا
وجوايا ميت احساس
يا بنت الناس
انا شارى ومش بايع
انا جايلك ومش راجع
ودا معقول
انا ابعد
وليه ف القرب نتواعد
و ليه ف البعد هنساكى
هاقولك حاجه ع الماشى
وانا قاعد
هناك وحدى
على شط الهوى والشوق
انا والصوره والكلمه
اللى قلتيها
وهمى ف بعدك انتى
الزاد
وقلبى ف البلاد
حايم
ومش فاهم
بحبك
حبتين احساس
وميت موال
وميت غنوه
وميت كلمه
بتتزوق
وتتروق
عشان تييجى
واقولهالك
واجيبهالك
ما هو انتى الزاد
وانتى الضحكه ساعه الاه
وانتى الضي
وعمرى الجاي
وليه البعد
وانتى القرب
وانتى الدرب
انا وقلبى
هناك قاعدين
فى بلاد الشوق المنسيه
بنتونس
فقلت انى
اقولك حاجه ع الماشى